Ginplastar kahapon sang Task Force El Niño sa pagpanguna sang
Department of Agriculture-Regional Field Unit 6 (DA-RFU 6) ang mga plano agod mapahagan-hagan ang epekto sang El Niño sa Kabisay-an Nakatongdan.
Sa press conference nga ginhiwat kahapon, gintuad ni DA-RFU 6 regional executive director Larry Nacionales nga magabuligay ang nagkalain-lain nga ahensya sang gobyerno agod mabuligan ang mga labing apektado sang tig-ilinit ilabi na ang mga mangungoma kag ila pamilya.
Ang task force ang ginabug-osan sang mga miembro sini nga ginalakipan sang National Irrigation Administration (NIA), Bureau of Fisheries and Aquatic Resources (BFAR), National Food Authority (NFA), Bureau of Agricultural Statistics (BAS), Department of Social welfare and Development (DSWD), Department of Labor and Employment (DOLE) kag Office of Civil Defense-Regional Disaster Coordinating Council (OCD-RDCC).
Sa karon, suno pa kay Nacionales, nagapadayon pa ang pag-identify kag pag-validate sang listahan sang mga apektado nga pamilya sang mga mangungoma sa Kabisay-an Nakatongdan nga sa karon naglab-ot na sa kapin 29,177.
Nahibaloan gikan sa report sang Philippine Atmospheric Geophysical Astronomical Service Administration (Pag-asa) nga ang kaprobinsiahanan sang Iloilo, Capiz kag Negros Occidental ang ginakabig highly vulnerable sa El Niño samtang ang probinsia sang Antique kag Aklan ang moderately vulnerable.
Sa karon ang mga apektado nga lugar ang ginalakipan sang southern portion sang Antique; first kag second district sang Iloilo kag ang probinsia sang Guimaras.
Base sa datus sang task force, kapin 32,300 ektaryas sang humayan sa rehiyon ang apektado sang El Niño kon sa diin 11,031 diri ang totally affected ukon wala na tsansa nga maluwas pa samtang 21,268.84 ektaryas naman ang partially affected.
Ang kabug-osan nga bili sang palay nga nahalitan ang naglab-ot sa P635.5 milyon samtang minimal lamang ang kapierdihan nga na-rekord sa produksyon sang mais kon sa diin 87.50 ektarya ang nahalitan, santo sa report sang task force.
“Kalabanan sa mga pananom sa rehiyon ang na-harvest na antes pa man nag-imbukada ang El Niño. Now, what is important is that we enable farmers to immediately be able to plant as the effects of the El Nino phenomenon weakens,” siling ni Nacionales.
Samtang, may nahuman naman nga mga estratehiya ang task force agod mapahagan-hagan ang epekto sang El Niño sa mga mangungoma.
Kabahin diri ang pagpatigayon sang cloudseeding operations, pagpanagtag bomba kag pagpaayo sang irrigation system.
Magapanagtag man sang mga binhi sang mga pananom ang DA para sa gusto nga magtanom sang mga alternatibo nga pananom nga makabato sa tig-ilinit.
May mga intervention ma nga pagahimuon ang Department of Labor and Employment (DOLE), Department of Social Welfare and Development (DSWD) kag iban nga ahensya sang gobyerno sa kon paano makabulig sa mga pamilya sang mga mangungoma nga apektado sang El Niño.
David Mikael Taclino
Inyu Web Development and Design
Creative Writer
0 comments:
Post a Comment